فرقة الموت بقلم حمادة هيكل
حسيت بحد فتح باب أوضتي بعد نص الليل ..برغم اني عايش لوحدي..
الباب اتفتح بشويش فتحت عيوني
لقيت خيال أسود واقف على الباب
ملامحه مش باينه ..لكن شوفت في ايده
حاجة بتلمع..زي ما يكون سكين او خنجر
شكله حاد جدا
لسه هصرخ ..لقيته في ثانية اتحرك ووقف جنبي
وحط إيده على فمي وكتم نفسي
وفضل بيبص لي بتأمل ..بيحرك رقبته يمين وشمال
جسمي كله كان بيتنفض ..ومش قادر اتحرك
ولا اقاوم ..وبعدها رفع الخنجر وطعني بيه
صرخت بقوة وقومت من النوم مفزوع
كابوس!! كابوس لعين
دخلت المطبخ وفتحت التلاجه وطلعت ازازة مايه
شربتها
قعدت قدام التليفزيون في الصالة ع الكرسي الهزاز
فضلت اقلب في القنوات وجبت فيلم
البطل كان شاب عايش لوحده .
بيخلص شغله ويرجع البيت ..ويجهز لنفسه الأكل
لغاية ما في ليلة وهو سهران باب شقته خبط
في نص الليل وهو سهران قدام التليفزيون
بص من العين السحرية ..لقى بنت جميلة
لكن ظاهر على ملامحها علامات الذعر والخوف
وبترن الجرس بسرعه وبتبص وراها
وكأنها خايفه من حد بيطاردها
فتح لها الباب ودخلت بسرعه ..
سألها مالك في ايه
انا !! في شخص بيطاردني
وعايز يقتلني ..
قالها والسبب !!
لاني فشلت
وايه هو صيد اليوم!!..سمك ولا طيور
لأ ..بني ادم
وبعدها ملامحها وشها عيونها اتبدلوا بشكل مخيف
جحظت عيونه أول ما غرست أنيابها
وهي بتقول انت صيد اليوم
وقع على الأرض وفضل يتلوى وهو بيصرخ
لحد ما فقد الوعي
وبعدها بدقيقة وقف مرة تانية بس لون عيونه
اتحول وبقه شكله مخيف
ابتسمت وقالت ..انت دلوقت
انضميت لفرقة الموت ..هكلمك
تاني عشان أعرفك المطلوب منك
واضح انه فيلم حلو اوي
وانا مشدود ليه جدا وبتابع احداثه بشغف
وفي نص الفيلم..سمعت جرس الباب
غريبة مين هيجي لي في الوقت دا
قومت بصيت من العين
ومكنتش مصدق أن اللي ع الباب
هي نفس البنت اللي كانت في الفيلم
طبعا مفتحتش
لكنها فضلت تبكي وتصرخ وتتوسل لي
اني افتحلها
رفضت ارد او اتكلم ..ورجعت بضهري
بهدوء عشان متسحش أن في حد جوه
روحت ناحية التليفزيون ومسكت الريموت وطيت الصوت
وسمعت صوت ضحكه مرعبة من ورايا
ألتفت ولقيتها قاعدة على الكرسي الهزاز
بصوت مرتعش سألتها
دخلتي هنا أزاي ..انا مفتحتش الباب
انت ليه خايف تفتح لي الباب
انا ...انا
انا عارفه انك عاطل عن العمل من مدة
بس خلاص شغلك عندي
شغل ايه !!
ايه رأيك تنضم للفرفقة بتاعتنا
فرقة
قالت بصوت مخيف
فرقة الموت !!
لقيتها أبتسمت وشوفت أنيابها بتستعد للهجوم
عليا .
تمت
فرقة_الموت
حماده_هيكل
