قصه كامله مشوقه
أنا هتطلق
تتطلقي هو أنت كنت إتجوزتي علشان تتطلقي!
أنا مش بهزر أنا بجد هتطلق
طب ممكن تهدي وتحكي ال حصل
أنا حاسة إنه مش بيحبني حاسة إنه متعود على وجودي وخلاص
إزاي ال شايفينه إنه بيحبك بجد أنت ال بتأڤوري
شايفين كدا يعني
أيوا هو علشان بس مشغول مع مامته وتعبها ف ممكن يكون مقصر شوية فعلا
يمكن!
المهم كإني مقولتش حاجة
سيبتها ودخلت أوضتي وأنا حاسة بندم إني قررت أتكلم طبيعي محدش يفهمني طبيعي محدش يحس بمشاعري طبيعي محدش يشوف ال شايفاه!
أنت فين يا غيث مش قولنا هنتقابل دلوقتي
معلش يا آية نسيت
معلش يا آية نسيت معملتش منبه يفكرك ليه يا غيث ذنبي إيه أجهز وأنزل وأستناك كدا
خلاص يا آية آسف قولت لك نسيت ومشغول
ماشي يا غيث سلام
قفلت الموبايل بغضب ورجعت البيت وأنا متعصبة جدا بسبب عدم لامبالاته وصلت البيت وغيرت هدومي ودخلت المطبخ أعمل حاجة حلوة أتوه فيها
غيث برا إلبسي واخرجي له
كنا بعد المغرب وكنت في الأوضة ودخلت أختي قالت كدا حاولت
زعلانة
شوية
طب حقك عليا متزعليش
غيث ممكن تحسسني إني بجد مهمة عندك وإنك بتحبني
ليه بتقولي كدا
علشان
لسة بجاوبه لقيت ماسدج وصلته ف فتحها وإتلهى فيها وقت مش قليل غضب عني إتضايقت وإتعصبت وأنا بتكلم
قوم إمشي يا غيث
إيه دا في إيه
فيه إنك مش محترمني ومش محترم الوقت ال مقضيه معايا أنت حتى مش محترم الحوار ال بيننا!
محصلش حاجة لكل دا حاجة مهمة وبرد عليها وكنت هرجع أسمعك!
وأنا مش عايزة كدا يا غيث مش عايزة أحس إني رقم اتنين!
وأنت عمرك ما كنت رقم اتنين!
مش بالكلام!
طب أنت عايزة إيه دلوقتي
خلينا نفركش يا غيث أو حتى نبعد فترة شوف أنت بجد بتحبني وعايزني ومحترمني ولا لاء أنا مش قادرة أستحمل كدا
نفركش ونبعد إيه أنت عبيطة إحنا فرحنا كمان أسبوعين! وبعدين إيه كلامك الأخير دا ما أنت عارفة إني بحبك
لاء مش عارفة مش عارفة غير إني مش مرتاحة
طيب يا حبيبتي واضح إنك سخنة دلوقتي أو حد لاعب في دماغك
كان هيتحرك ناحية الباب ف قومت بسرعة وقفت قدامه أقطع طريقه بكلامي العالي
أقسم بالله لو سخفت من كلامي تاني أو سيبتني كدا لأبوظ العلاقة دي وأتطلق بجد يا غيث
صوتك لو بقا عالي كدا تاني مش هيحصل حلو يا آية
جت ماما على صوتنا وإتكلمت بتساؤل
مالكم يا ولاد إهدوا كدا وصلوا على النبي
عليه الصلاة والسلام أنا ماشي بس لينا كلام تاني يا آية
خرج بعد ما بص لي جامد فضلت واقفة مكاني بعصبية لحد ما ماما هزتني وسألتني
عملتي إيه تاني
معملتش
إتلمي يا آية وإعقلي دا جوزك ولازم تحترميه متقوليش جوزي ولو حد لازم يحترم التاني ف هيكون هو ال لازم يحترمني
لاء جوزك أنت ناسية إن كتب كتابكم كان كبير وفيه إشهار
يعني إيه
يعني كان زمانك في بيته دلوقتي وبعدين أنت لازم تعذريه دا واحد والدته تعبانة وعمال يلف بيها علشان تروق دا غير إنشغاله في حوار البيت والفرح والمسؤولية ال داخل عليها يعني خلي عندك إحساس وقدري ال بيمر بيه
خلصت كلامها وسابتني هي كمان قعدت على الكرسي
مامت غيث إتوفت!
جملة سمعتها أول ما صحيت خلتني مش مركزة في أي شيء غير فيه! هو هو عامل إيه دلوقتي حاسس بإيه موجوع بيعيط عايز حد يسنده عايزني
أسئلة كتيرة كنت بطرحها وأنا بلبس بسرعة ونازلة رايحة المستشفى وصلت وطلعت لقيته قاعد مستني إتمام الإجراءات علشان يخرج بيها
وقفت في بداية الممر وبصيت عليه كان حاطط وشه بين كفوفه ومنزل راسه قربت عليه ورفعت راسه ليا وبصيت له ثواني
البقاء لله يا حبيبي
مش مصدق إنها راحت!
مقدرة حزنه عليها كانت كل حياته هو ابنها الوحيد ال ربته لوحدها بعد وفاة باباه وقت ما كان صغير كنت أحيانا بغير من حبهم لبعض بس في نفس الوقت كنت بتمنى ابني يحبني كدا!
إندهي غيث ودخليه الأوضة دي وخليه ياكل بيقولوا مأكلش حاجة من إمبارح
كنا في نهاية اليوم والناس بدأت تقل ماعدا أهله وأهلي قومت جهزت الأكل ودخلته ورنيت عليه ييجي
يلا علشان تاكل
مش عاوز
يا حبيبي علشان خاطري متعملش في نفسك كدا لازم تاكل علشان تقدر
مش قادر حاسس إن الوقت وقف عند اللحظة ال راحت
